طيب السيرة
يا الله يا رب السماء رب الأقـدار
ياعالـم بالغيـب شـره وخيـره
ياللي بحكمك كل شي لنا صـار
يا اللي بعلمك كل شـي تديـره
جانا خبر غطى على كل الأخبـار
راح الزعيـم بليلـه مستـذيـره
كل فقد نوره من صغـار وكبـار
مصيبة مـا هـي علينـا يسيـره
مع زايد الأيام فرحـات وأعمـار
وكن الليالي بعـد زايـد عسيـرة
الدار تبكي ياعرب حاكم الـدار
والناس ترثي زايـد بكـل ديـره
شعبه بكاه وتبكي الشيخ الأشعار
شيخ بنا فـي عالـم المجـد سيـره
خيره وصل للناس في كل الأقطار
سفارتـه طيبـه وفعلـه سفيـره
معروف في شوره إذا جات الاشوار
قايد حكيم وفذ راعـي بصيـرة
ما حط بين الشعب وعيونه أسـوار
شعب عشق زايد ولا حب غيـره
تاريخه ابيض ما بها شـك وإنكـار
مسيـره ياطيبهـا مـن مسيـره
يا الله ترفع منزلـه بيـن الأخيـار
وتطهره يـا رب وانـك وتجيـره
يا اللي بحكمك كل شي لنا صـار
يا عالـم بالغيـب شـره وخيـره
الإثنين أكتوبر 22, 2007 5:13 am